BUTUAN CITY – Hingpit nang naila ang patay’ng lawas nga napalgang naglutaw-lutaw sa creek sa Purok 6. Brgy. Babag ning siyudad kagahapon sa buntag.
Sa pakighinabi sa Bombo Radyo Butuan, giila ni Lorna Calo nga umagad niya ang biktimang si Cezar Sabuero, 34-anyos, dunay 2 ka anak og residente sa Barangay Agusan Pequeño.
Saysay pa sa ugangan nga si Lorna, niadtong Domingo sa dihang nag-inom ang biktima ug sa iyang barkada ug bayaw sa ila ra usab nga balay.
Iya pa kining gilutuan og tinuwang isda aron makahigop apan sa dihang gabii na ug nahubog na ang biktima, nag-wild kini og mibunot pa sa iyang dalang hanting og tungod sa iyang kahadlok, mitawag kini ug Barangay Tanod ug pulis nga dali usab nga miabot, hinungdang nanagan na ang tanang nalambigit sa away apil ang nag-wild niyang umagad.
Sa pagkabuntag na niya gipahibalo usab ang ginikanan sa maong lalaki nga nangeta kinig away human lage nahubog. Apan kagahapon sa buntag, wala niini damha nga ang gikagubtang patay’ng lawas nga naglutaw-lutaw, miyembro diay kini sa ilang pamilya.
Sumala pa sa ugangan nga sa dihang nabatian ang paghulagway sa senina sa biktima, gisugo niya ang iyang anak nga klaruhon kini didto sa punerarta og nasuta nga omagad diay niya ang biktima.
Dihang gipahibalo na niya ang ginikanan sa biktima, nasuko ang mga niini sa pagtoong gikulata matud pa ang ilang anak hinungdang gipailalom sa autopsiya ang patay’ng lawas sa biktima ug didto nasuta nga nalumos ang biktima.
Hinoon nakasabot usab ang na-ilong pamilya niini human gi-estoryahan sa kapulisan ug sa SOCO. Sa karun ang ilang dakong problema mao ang bayronon nila sa punerarya og hangtud na sa pagpalubong sa biktima. (Rolan Janea)
