BUTUAN CITY – Giklaro ni P/ Sr. Insp. Venus Cale, Regional Information Officer sa Police Regional Office kon PRO-13 nga walay madawat nga benipisyo gikan sa PNP ang pamilya sa napatay nga pulis atol sa buybust operation kagahapon sa alas 2:10 sa hapon sa Purok 9, Brgy, Tolosa, Cabadbaran City sakop sa lalawigan sa Agusan Del Norte.
Giila sa opisyal ang biktima nga si PO1 Ric Lyndon Cena, menyu, residente sa maong dapit, 11 ka tuig na sa p panerbisyo ug naka-destino sa municipal police station sa lungsod sa Remedios T. Romualdez kon RTR nga kasikbit lang sa Cabadbaran City sa lalawigan usab sa Agusan del Norte.
Gikumpirma ni P/ Sr. Insp. Cale nga lakip ang biktima sa listahan ni Pangulong Rodrigo Duterte sa mga pulis nga nalambigit sa ilegal nga drugas og apil sa 5 ka mga pulis nga misibat sa random drug test hinungdang napasakahan kini ug kaso.
Dugay na usab kining target sa kapulisan og kagahapon lang kini na-operisyunan apan sa dihang nakamatikod ang suspek nga pulis ang iyang ka-transaksiyon, mibunot kini sa iyang 9mm nga pistola hinungdang napusilan kini sa otoridad.
Nadala pa kini sa Cabadbaran Emergency Hospital apan gideklarang dead on arrival sa attending physician tungod sa nahiagum nga samad pinusilan sa ulo og lawas.
Nakuha sa posisyon sa suspek ang 15 ka sachet nga dunay sulod sa gitoohang shabu nga mitimbang ug 3 gramos og market value nga 35-mil 400 pesos.
Lakip sa nakuha ang 9mm nga pistola nga puno sa bala; lima ka empty shells sa wala masutang kalibre sa armas; 2 ka cellpone; usa ka Honda motorcycle og duha ka plate numbers.
Ang narekober nga mga ebidensiya, gisubmite na sa Regional Crime Laboratory Office 13 alang sa examinasyon.
