BUTUAN CITY – Nag-atubang sa patong-patong nga kaso ang tigpayuhot sa ginadiling drugas nga nasikop sa buybust operation sa niaging alas 3:00 sa hapon sa may Purok 1A, Brgy. Port Poyohon, Butuan City.
Kini tungod kay gawas sa gitoohang shabu, nakuhaan usab ang suspetsado og mga armas ug bala. Naila ang suspek nga si Nick Laurence Perol Paronda, 35-anyos, menyu, usa ka construction worker og residente sa maong dapit.
Gihimu ang operasyon sa hiniusang puwersa sa Butuan City Police Station-2, Criminal Investigation and Detection Group kon CIDG-Agusan Del Norte sa pakig-alayon usab sa Philippine Drug Enforcement Agency kon PDEA-Caraga.
Sa nasangpit nga operasyon nakuha ang 8 ka sachet sa plastic sachet nga dunay gitoohang sulod nga shabu nga mitimbang ug 7 gramos og market value nga 47-mil 600 pesos.
Lakip sa nakuha ang usa ka unit sa improvised shotgun, usa ka unit sa Homemade shotgun o mas nailang SUMPAK, 5 ka buhing bala sa shotgun, gi-assemble nga magazine sa shotgun ug nagkadaiyang illegal drug paraphernalia.
Gikustudiya ang suspek sa CIDG-caraga alang sa tukmang disposasyon.
