BUTUAN CITY – Gihagit ni Akbayan Partylist Rep. Tom Villarin ang katawhan nga dapat bantayan ang mahimong implementasyon sa Philippine Identification System Act nga gipirmahan ni Pangulong Rodrigo Duterte kagahapon, Lunes.
Sa pakighinabi sa Bombo Radyo Butuan kang Cong. Villarin, gi-angkon niining dunay positibong nalantawan sa national ID System sama nalang sa paghiusa sa tanang mga ID nga seguradong dili na mahasol pa ang tawo.
Apan sa karun nga political climate matud pa, mamahimong gukuron na niini ang taga-oposisyon pinaagi sa pag-gamit sa impormasyon.
Mamahimo matud pang buhatan nila ug profile ang usa ka tawo nga posibling makasupak sa right of privacy.
Kinahanglang bantayan sa katawhan kung unsa may pangayoong impormasyon nga ibutang sa maong ID og kung masutang nakasupak kini sa right to privacy mamahimo silang magpasaka ug kaso sa supreme court.
Samtang mamahimo usab nga magamit ang overisight committee sa kongreso aron lang dili makompromiso ang katungod sa tawo.
Gikuwestiyon pa sa magbabalaod ang derektang benipisyo nga mahatag niini ngadto sa mga yanong indibidwal.
Samtang lagmit usab nga madugangan ang budget sa Philippine Statistics Authority kon PSA tungod kay sila man ang mag-implementar niini.
