BUTUAN CITY – Gikataw-an lang ni kanhi Senador og Consultative Committee kon ConCom member Aquilino ‘Nene’ Pimentel Jr. ang nag-viral karon nga video sa pederalismo nga gi-post sa Facebook account ni Communications Assistant Sec. Mocha Uson nga gi-interpret sa usa ka blogger pinaagi sa bastos nga sayaw.
Sa eksklusibong pakighinabi sa Bombo Radyo Butuan, gipadayag ni Pimentel nga klarong wala masabti ni Uson ang sinugdanan og padulngan sa konsepto sa pederalismo hinungdan nga mas maayong pasayluon na lang ang maong kalihim.
Tungod niini, iyang nadumduman ang sugyot kaniadto ni ConCom spokesman Ding Generoso nga gamiton ang Facebook account sa kalihim sa pag-promote sa federalism tungod sa kadaghan sa mga followers niini.
Apan tungod sa kasaba karon sa mga pagsaway nga na-ani sa maong FB post sa jingle sa pederalismo, nahuna-hunaan ni Pimentel nga kinahanglang ang mag-post og impormasyon kalabot niini mao kadtong mga tawong duna’y saktong kahibalo sa pederalismo.
Samtang sa imbitasyon ni Senador Nancy Binay nga si Uson ang mupasabot sa Senate hearing kalabot sa pederalismo, misamot pagkatawa si Pimentel tungod kay tumong lang matud pa ni Binay nga sukdon ang kawala’y kabangka-agan ni Uson sa maong hisgutanan. (Beth Ruiz)
