BUTUAN CITY – Padayon pa karun ang imbestigasyon sa kapulisan sa pagpusil-patay sa usa ka Datu diin ang gitoohang mga responsible mga rebelding NPA kagahapon sa alas 8:30 sa buntag sa may Purok-1, Barangay Kasiklan, lungsod sa Las Nieves, Agusan Del Norte.
Giila ni P/ Insp. Hildo Ruasa, Hepe sa Las Nieves Municipal Police Station ang biktimang si Roberto Acedo alyas Datu Bidog, hingkod ang panuigon menyu og residente sa maong dapit.
Base sa inisyal nga imbestigasyon sa kapulisan, pagawas sa ilang balay ang biktima sa dihang gipusil sa tulo ka mga tawo nga sakay sa usa ka single motor gamit ang mugbo nga klase sa armas.
Na-igo sa tulo ka higayon diha sa likod ang biktima hinungdan sa hinanaling kamatayon. Sa pagpanubay sa kapulisan, duna nay nadawat nga death threat ang biktima gikan sa rebelding New People’s Army kon NPA tungod sa pagpanguna sa maong Datu sa pagpang-recruit aron mahimong CAFGU.
Dugang pa sa Hepe nga human sa maong hitabo, gelayon silang nagmontar ug checkpoint kauban ang kasundaluhan apan pakyas silang madakpan ang mga suspetsado.
