BUTUAN CITY – Gibana-banang mo-akomodar ug 60 ka mga tawo ang kampo sa New People’s Army nga nailog sa militar human ang engkuwentro kagahapon sa alas 2:20 sa hapon sa may Sitio Cogon-Cogon, Brgy. Tagmamarkay sakop sa lungsod sa Tubay, Agusan Del Norte.
Sigon ni Lt. Romalyn Cabiles, Civil Militar Operation kon CMO Officer sa 29th Infantry Battalion Philippine Army, nakadawat sila og impormasyon gikan sa mga sibilyan sa maong dapit mahitungod sa presensiya sa rebeldeng grupo.
Dali nila kining girespondihan hinungdan sa natigayong engkuwentro nga milungtad og 20 minutos og pagkakumpiska human sa giyera, sa usa ka AK47 nga armas, wire nga gamit sa paghimu ug improvised explosive device, usa ka IED mismo, backpack og mga personal nga gamit.
Gibutyag pa sa opisyal nga walay natalang casualty sa han-ay sa kasundaluhan apan dunay nakitang lama sa dugo sa encounter site kansa nagpasabot nga dunay na-igo sa pikas grupo.
Tungod niini, mas gi-aghat sa opisyal ang katawhan nga dili magduha-duha sa paghatag ug impormasyon aron masanta ang daotang binuhatan sa walhong grupo.
Samtang nanawagan kini sa tanang naglihok sa kabukiran, nga abli ang militar sa pagdawat kanila ugaling gusto na nilang musurender og mobalik sa sabakan sa gobyerno. (Rolan Janea)
