BUTUAN CITY – Halos dili na ma-ila sa iyang mga kabanay ang usa ka ulitawo kinsa napalgan nang wala’y kinabuhi pasado alas-8:30 kagahapon human nahanaw ning mi-aging Hulyo 19 pa dihang naligo sa dike atol sa iyang pagkahubog.
Sigon ni PO2 Felix Bug-os Jr. pinaagi na lang sa iyang tattoo naila ang biktima nga si Mark Gil Iligan, 34-anyos, residente sa Tandag City, sa lalawigan sa Surigao del Sur.
Migawas sa ilang gihimong pakisusi nga higayong mahubog matud pa ang biktima, na-andan na niini ang pagkaligo og dagat dapit sa dike sa ilang lugar.
Wala sila magdahom nga malumos kini tungod kay busero matud pa kini og anad nang mu-utong ilawom sa dagat sulod sa pipila ka minuto.
Dihang katapusan nila kining nakit-ang naligo sa dagat, wala na dayon kini nila nakita pa hangtud nga milabay na lang ang upat ka adlaw diin napalgan na lang kining patay na nga naglutaw-lutaw sa dagat og inanay nang nadugta.
