BUTUAN CITY – Miresulta sa pagkasikop sa upat ka mga suspetsado samtang usa ang patay sa gihimung anti-illegal drug operation ning rehiyon sa Caraga kagahapon.
Naila ang mga nasikop nga sila Nexon Rufano, 27-anyos nga taga Brgy. Sto. Niño, Jabonga, Agusan del Norte; Agsen Paner, 42-anyos residente sa Brgy. Afga, Sibagat, Agusan del Sur; Roberto De Guzman, 33-anyos nga lumolupyo sa Brgy. Sampaguita, Veruela, Agusan del Sur; ug Karim Saip, 28-anyos nga taga Brgy. Poblacion, Barobo, Surigao del Sur. Samtang sa Brgy. Poblacion, Trento, Agusan del Sur, dunay gihimong buy-bust operation ang kapulisan batuk kay Ricky Datolayta mga alas 6:00 sa sayung gabii.
Sa dihang nakamatikod ang suspek sa presensiya sa otoridad, mibunot ang suspect sa iyang dalang armas og mipabuto ngadto sa operatiba nga mibalos usab hinungdang napatay ang suspetsado.
Narekober gikan sa iyang posisyon ang caliber .38 revolver nga dunay tulo ka mga buhing bala samtang tulo usab ang basyo, granada og nagkadaoyang illegal drug paraphernalia.
Sa kinatibuk-ang operasyon sa Caraga miresulta sa pagkakumpiska sa 22 ka sachets sa shabu nga mitimbang og 4.47gramos nga mikantidad sa 52-mil 746 pesos.
Ang nadakpang nga suspetsado ang nag-atubang og kasong paglapas sa RA No. 9165 o the Comprehensive Dangerous Drug Act of 2002.
