BUTUAN CITY – Human ang duha ka adlaw nga pag-anod anod sa kadagatan sa Pasipiko samtang sakay sa naguba nilang panagatan, hingpit nang naluwas sa managatay sa lungsod sa Barobo, Surigao del Sur ang duha ka na-missing nga managatay usab nga taga-General Luna. Siargao Island sa lalawigan sa Surigao del Norte.
Naila ang mga nabangalan nga sila Dennis Dumagtoy, 33-anyos og Joliven Dacera, 28-anyos, pulos residente sa General Luna.
Sa eksklusibong pakighinabi ning sibyahan, gibutyag ni Dino Dumagtoy – igsoon sa usa sa mga biktima, niadto matud pang Miyerkules sa alas-kwatro sa hapon mibiya ang duha padulong sa Pacific Ocean sakay sa usa ka pumpboat ka-uban ang lain pang mga mananagat nga sakay usab sa laing sakyanang pandagat.
Naka-uli na lang ang ilang mga ka-ubanan apan wala ang duha hinungdan sa ilang tumang kabalaka. Kagahapon sa alas-singko sa hapon, nabangalan sila sa kadagatan sa Barobo nga naluya na tungod sa kawala’y kaon og ma-inom nga tubig.
Dinhi pa nila nasayran nga nada-utan sa ilang sakayang pandagat ang duruha hinungdan nga nagpa-anod anod na lamang kini hangtud nga naluwas sa mga mananagat nga naka-agi kanila. (Beth Ruiz)
