BUTUAN CITY – Nakumpiska sa mga otoridad ang 81 ka sakong pina-ugang brown algae human misumbong ang mga opisyales sa Brgy. Anibongan, lungsod sa Gigaquit, Surigao del Norte.
Naaresto sa operasyon ang duha ka mga babayeng maoy magdawatan og magbantayan sa maong mga brown algae nga sila Rosalinda Daganasol, 46 anyos, minyo, taga-Basilisa, Dinagat Islands province og Bernadette Ligalig, 44 anyos, minyo, taga-San Juan, Surigao City kinsa gikustodiya na sa police station.
Nasayang gikan pa ang maong mga marine products sa isla sa Cagdianao, sa Dinagat Island province og gi-agi sa baybayon sa Brgy. Anibongan, og dalhon matud pa sa Cagayan de Oro City.
Gipasakaan na sila og kasong paglapas sa Fishery Administrative Order No. 250 series of 2014 ingon man kasong administratibo ilabina dihang nasayrang wala sila’y gihuptang mga dokumentong magpamatuod nga legal ang ilang gihimo. (Melody Valledor)
