BUTUAN CITY – Na-alarma na ang Butuan City Police Station kon BCPS-1 sa sunod-sunod nga pagpatala sa mga negosyante ingon man mga empleyado sa mga business establishments ning siyudad kinsa parehong biktima sa dako nga scam nga gihimo sa usa ka ginganlan og Jefferson Luna-Pizarro.
Sigon ni station commander P/Sr. Insp. Paul Paden, sa halos usa ka semanang modus nga gihimo sa suspek sa nagkada-iyang negosyo sama sa pagpangilad niini sa bugasan, appliance center, car center, parmasya og uban pa, gibana-banang mu-abot na sa 2.5-milyunes pesos nga balor sa nagkada-iyang produkto ang iyang nahakot gikan sa dili mu-ubos 21 ka mga tawong iyang nabiktima.
Gipasalig sa opisyal nga ilang mapasakaan og kaso ang maong suspek base sa mga transaksyong iyang gisudlan tali sa mga reklamante gamit ang mga tseke nga iyang gi-isyu, gigamit nga ID og uban pang dokumentong iyang gipresentar.
Apan ang gilantaw niya karong problema mao ang posibilidad nga migamit lang kini og alyas kondiin posibleng ang gigamit niining pangalang Jefferson Luna-Pizarro, dili mao ang iyang tinuod nga identity.
Gidugang pa sa opisyal nga planado kaayo ang maong modus tungod kay gihimo ang mga transaksyon ilabina ang pag-isyu og closed account na nga mga tseke bugti sa nakuha niyang mga items, mga adlaw mang Sabado og Dominggo.
Niining adlawa dili maka-transact sa bangko ang mga na-isyuhan og tseke hinungdan nga ulahi nang nasayran nga pulos untol ang nahuptan nilang mga tseke nga nagbalor og libuan ka piso.
