BUTUAN CITY – Gipasaka na ang kasong pagsupak sa Republic Act kon RA 9165 batuk sa anak sa kanhe konsehal sa Butuan City ug laing 2 ka kaubanan niini human ang malampusong buybust operation kagahapon sa alas 5:40 sa hapon sa may Barangay Mabini, siyudad sa Cabadbaran sakop sa probinsiya sa Agusan Del Norte.
Giila ni Dindo Abellanosa, Regional Information Officer sa Philippine Drug Enforcement Agency kon PDEA-Caraga ang mga suspetsado nga sila Artemio Radaza Jr,; Kenneth Isaac Epis, 34-anyos, olitawo og Sonny Cawson, 27-anyos, olitawo og parehong residente sa Barangay Libertad ning dakbayan.
Ang nasangpit nga operasyon gikasa sa hiniusang puwersa sa Regional Intelligence Division sa PRO-13, Cabadbaran City Police Station og PDEA-Caraga.
Sumala pa ni Abellanosa nga sakay ang mga suspetsado sa usa ka HI Lux og sa dihang nikanaog ang suspek nga si Radaza, nakamatikod ang kauban niini nga police ang ka-transaksiyun hinungdang gipasutoy sa pagpadagan ang sakyanan og gibayaan si Radaza.
Apan nadakpan gihapon ang mga niini pag-abot sa checkpoint sa may Barangay Sumilihon, Butuan City.
Nakuhaan ang mga suspetsado sa marked money nga usa ka libo ka pesos, mga illegal drug paraphernalias og 14 ka sachet nga dunay sulod sa gitoohang shabu nga mitimbang ug 16 gramos ug market value nga miabot sa 188-mil 800 pesos.
Giklaro usab sa opisyal nga anaa sa watchlist sa kapulisan ning siyudad ang mga suspetsado nga dugay nang gipanid-an. Lakip usab sa gikumpiska ang sakyanang Hi Lux nga gipanag-iyahan sa suspek nga si Cawson.
