BUTUAN CITY – Padayon pang gipangita sa hini-usang pwersa sa kapulisan sa Bayugan City sa lalawigan sa Agusan del Sur og Butuan City Police Station 2 ang lawas sa usa ka chop-chop victim aron kini ma-ilhan na.
Kini human napalgan kagahapon sa hapon sa Brgy. Noli, Bayugan City ang nadugta nang mga kamot og tiil sa wala pa mailhing indibidwal, kapin duha ka semana human matapos unang napalgan ang kalabera na nga ulo sa tawo nga mga usa ka gatus metros lang ang kalayo.
Sigon ni P/Supt. Romeo Villalobos, hepe sa Bayugan City Police Station, miadto gilayon sila sa Butuan City Police Station 2 ning siyudad tungod sa duda sa pamilya sa usa ka babayeng magtulo ka buwan nang missing nga posibleng duna’y kalambigitan sa kalit nga pagkawala ni Arnadette Pepito, taga-Brgy. Noli, Bayugan City nga duna’y live-in partner nga Koreanong kalit lang usab nga nahanaw gikan sa ilang gipuy-ang boarding house sa Purok 3, Brgy. Obrero ning siyudad og gibiyaan ang ilang tindahan.
Mikusog usab ang pagtuo sa mga ka-boardmates sa duruha nga posibleng duna gyoy dautang nahitabo kang Pepito tungod sa ngil-ad nga baho sa gibiyaan nilang kwarto nga subject for search sa SOCO.
Nasayran sa tag-iya sa boarding house og sa mga opisyal sa barangay nga ning katapusan sa Abril gisugo matud pa sa Koreano ang duha ka mga lalaking anaa sa gawas sa tindahan niini nga dalhon sa jeepney terminal ang baldeng duna’y kargang lahi ang baho kansa matud pa mga isda lang.
Gidudahang gikan ang baho sa septic tank nga anaa sa gi-abangang kwarto usab sa duruha nga maoy subject for search karon sa SOCO. (Beth Ruiz)
