BUTUAN CITY – Padayon pang gi-imbestigahan sa mga sakop sa Butuan City Police Station 4 ang natigayong pagpamusil kaganinang alas-7:45 sa buntag nga miresulta sa pagkamatay sa usa ka kanhi barangay kagawad sa Brgy. Sumilijon ning siyudad.
Gi-ila ni station commander Sr./Insp. Roland Orcullo ang biktimang si Joseph Anthony Seno, residente sa Purok 1 sa maong barangay.
Base sa inisyal nga imbestigasyon, nasuta nga usa sa duha ka wala mailang lalaking sakay sa motorsiklo ang misulay pagsulod sa pinuy-anan sa biktima kay duna matud pa’y ipadalang gamit apan gipahulat lang kini sa gawas sa iyang igsoon.
Dihang migawas na ang biktima og nakita ang suspek, mibalik kini pagsulod apan dinhi na siya gipusil hinungdan sa iyang hinanaling kamatayon.
Sigon ni Orcullo, kagahapon pa lang duna na’y duha ka mga lalaking nakamotorsiklo nga nangita matud pa sa biktima og dihang wala nila kini makita, gituyuan na gyod nila kini pag-adto sa iyang pinuy-anan dayong pusil niini atubangan sa iyang pamilya. (Beth Ruiz)
