BUTUAN CITY – Hingpit nang misurender ang suspetsado nga miluba-patay sa usa ka miyembro sa gang sa may Barangay Doongan ning siyudad sa Butuan.
Sumala pa ni Barangay Kapitan Gilbert Enriquez, pasado alas 10:30 kaganinang buntag sa dihang misurender kaniya ang suspek nga si Ronaldo Labrador Enriques, menyu usa ka panday ug residente sa maong dapit.
Saysay pa sa Kapitan nga kagahapon sa alas 4:00 sa hapon sa dihang misulong ang biktima nga si Ronald Manansala alyas james, miyembro sa gang, sa panimalay ni Enriques diin sulod sa balay natigayon ang panaglalis.
Nakita matud pa ni Enriques nga nibunot sa iyang kutsilyo si Manansala, dinhe na niya kini gidunggab.
Nakadagan pa pagawas sa balay ang nalubaan nga gisundan pa sa suspek apan daghan diay naghulat nga mga kauban niini sa gang.
Sumala pa ni Kapitan Enriques nga daling misibat ang suspek human sa hitabo apan nakumbinse nila kining musurender.
Sa karun gikustudiya na sa Butuan City Police Station-2 ang suspek nga gikatakdang mag-atubang og kaso.
