BUTUAN CITY – Padayon pa karun ang imbestigasyon sa kapulisan aron masuta ang motibo og mailhan ang suspek sa pagpamusil patay kagabii sa alas 7:00 sa may Purok 6 Barangay Fili sakop sa Bayugan City, Agusan Del Sur.
Giila ni PO2 Rey Pagaora sa Bayugan City Police Station ang biktimang si Mark Anthony Vertudazo 25-anyos, dunay kapuyo, usa ka stock man sa usa ka Mall sa Bayugan City Branch og residente sa maong dapit.
Sumala pa ni PO2 Pagaora, pauli na ang biktima sakay sa tricycle, apan sa dihang mokanaog na unta kini, kalit kining gipusil sa wala pa mailang suspetsado.
Nakahiagum ang biktima ug duha ka igo sa bala diha sa nawong nga nadala pa sa ospital apan gideklara kining dead on arrival.
Wala matud pa makamatikod ang drayber sa tricycle sa pagpusil sa suspek nga gi-atol gyud sa paghunong sa sakyanan.
Nagtoo lang ang drayber nga ligid lang ang mibuto hinungdang kini mikanaog apan didto nakita nalang ang iyang pasahero nga nagkadugo na nga nagsandig sulod sa tricycle.
Sa pakisusi sa pulis, wala matud pay nakaaway ang biktima apan duna kini ka live-in nga dunay kapuyo na usab kaniadto ug dunay usa ka anak. Gidala na usab karun ang bala ngadto sa Crime Laboratory aron masuta ang kalibre sa armas nga gigamit sa kremin.
