BUTUAN CITY – Padayon pa ang imbestigasyon sa kapulisan sa Bislig City sa lalawigan sa Surigao del Sur aron matumbok na sa hingpit og makasuhan ang responsable sa pagtigbas-patay sa mag-live in partner kagabii.
Na-ila ang mga biktimang sila Crispin Escol, kinsa naka-angkon og samad-dinunggaban sa dughan og tinigbasan sa likod og ulo og naputol pa ang kamot samtang si Evangeline Calderon, duna’y bun-og sa iyang nawong og gilaslas pa ang li-og.
Sigon ni SPO3 Ruel Longgaquit, posibleng usa o kaha duha ka tawo ang mihimo sa brutal nga kremin.
Gisikop nila ang igsoon sa lalaki nga si Narciso Escol human nahimong person of interest tungod sa iyang pagguba sa crime scene ilabina ang pagkuha og paglabay niya sa sundang nga gigamit pagpatay sa mga biktima.
Usa sa ilang gilantaw nga anggulo ang posibleng personal nga bangi og love triangle ilabina nga napalgan nila sa crime scene nga wala’y sapot ang biktimang babaye.
Nasuta pinaagi sa testimoniya sa mga silingan nga ka-uban matud pa og inom sa mga biktima ang suspek dihang wala pa natigayon ang kremin. (Beth Ruiz)
