BUTUAN CITY – Ang panagbangi sa duha ka drug group ang gitan-aw karong motibo sa pagpusil-patay sa drug surrenderee nga si Adonis Rama Laolao, 36 anyos, ulitawo, residente sa may Purok 3, Brgy 9, Cabadbaran City, lalawigan sa Agusan del Norte.
Base sa saysay sa saksi naglantaw matod pa ang biktima ug TV sulod sa iyang panimalay dihang kalit lang nga misulod ang mga suspetsado nga naka helmet nga nagsakay og motorsiklo dayong pusil niini sa nagkada-iyang parte sa lawas.
Pito ka samad pinusilan ang na-angkon sa biktima hinungdan sa iyang hinanaling kamatayon samtang misibat usab padulong sa wala matinong direksyon ang mga suspek.
Samtang sa padayong imbestigasyon nasuta nga ang biktima myembro sa Calape Drug Group ug posibleng ang motibo sa insidente adunay kalambigitan sa bangi sa onsehan sa droga ngadto sa Salalima Drug Group.
Lakip sa mga narekober sa PNP personnel sa Agusan del Norte Provincial Crime Laboratory Satellite Office ngadto sa crime scene ang mga drug paraphernalias; unom ka kabhang sa bala; duha ka balinis sa wala pa nailang bala ug caliber; ug duha ka cellphones.
Padayon pa ang imbestigasyon sa Cabadbaran City Police Station aron pag-ila sa mga suspetsado sa ingon mapasakaan na og kasong pagpatay. (Melody Valledor)
