BUTUAN CITY – Padayon pa ang imbestigasyon sa kapulisan sa nahitabong pagpangawat kagahapon sa kaadlawon diin biktima niini ang Information Officer sa Butuan City Government.
Naila ang biktima nga si Eldy David, 49-anyos, menyo ug residente sa usa ka subdivision sa may Barangay Baan-Km-3, Butuan City.
Sa nakuhang impormasyon, nakadawat ug tawag kagahapon sa alas 3:40 sa buntag, ang ginsakpan sa Butuan City Police Station-1 gikan sa kaubanang police station particular na sa Butuan City Police Station 4 may kalabutan sa natigayong kawat.
Sa pagresponde nasayran nga samtang nahinanok sa pagkatulog si David kauban ang iyang asawa ug anak, sa dihang gisulod ang ilang panimalay sa kawatan.
Miagi ang kawatan pinaagi sa giguba niini nga bintana sa pansayan og gikuha ang Laptap nga gipanag-iyahan sa City Government, 5 ka unit sa nagkalain-laing klase sa cellphone, projector, duha ka unit sa mahalong relo ug cash nga 5-mil pesos.
Nahigmata nalang ang biktima nga nahanaw na ang ilang mga gamit hinungdang mireport kini sa kapulisan sa Ampayon Police Station nga daling mitawag usab sa Butuan City Police Station 1.
Padayon pang gisuta usab ang kinatibuk-ang kantidad nga natangag sa wala mailang kawatan.
