BUTUAN CITY – Gilubong na kaganinang buntag ang patay’ng lawas sa usa ka lalaki nga napalgan sa bakhawana kon mangrove area sa Purok 4, Talisay, Brgy Ganayon, Lianga, Surigao del Sur kagahapon sa hapon.
Ang wala pa mailang patay’ng lawas gibana-banang duna’y gitas-ong 5’7”, nagsu-ot ug maong nga short pantsnga duna’y bakos, gidala pa sa balay tamblanan alang sa post mortem examination.
Sigon ni SPO4 Magallano sa Lianga Municipal Police Station, tungod kay nadugta na ang maong patay’ng lawas nga gibana-banang lima ngadto sa pito ka adlaw nang naglutaw sa kadagatan, nagdesisyon ang ilang municipal mayor nga ilubong kini aron dili maghatag og kadaut sa panglawas sa katawhan sa maong palibot.
Duna matud pa’y pipila nga mitan-aw sa patay’ng lawas og dihang wala kini nag-match sa gipangita nilang kabanay, dinhi na nagdesisyon ang lokal nga kagamhanan sa pagpalubong niini.
Base sa gihimong medical examination, wala’y tima—ilhan sa lawas sa biktima nga kini biktima sa foul play.
Posible matud pa nga residente kini sa laing dapit og na-anod lang sa ilang lungsod dayon nasangpit sa mangrove area.
Dili na usab masuta kung duna kini tatoo sa rasong inanay nang nakita ang kalabera niini. (Beth Ruiz)
