BUTUAN CITY – Gi-release na gikan sa kustudiya sa kapulisan ang sakyanan lakip na ang driver human nakabangga-patay og 3-anyos nga batang babaye kagahapon sa alas 5:50 sa hapon sa may Purok-1, Barangay Taguibo, Butuan City.
Sa nakuhang impormasyon gikan sa Butuan City Police Station-4, nalambigit ang dump truck nga gipanag-iyahan sa Jinyi Import & Export Corporation Incorporated ug gimanehoan ni Steve River Nalisa, 41-anyos, menyu ug residente sa 855 Luzvimin Tribajo village sa Tagum city, Davao del norte.
Ang maong sakyanan nagsumikad sa Kulambugan, Sibagat, Agusan Del Sur ug padulong unta sa Cabadbaran City apan pag-abot sa nahitaboan, naligsan niini ang mitabok sa dalan nga si Jazel Cordero Milona, 3-anyos nga taga Purok-1 sa Barangay Taguibo.
Tungod sa nahiagum nga dili ti-aw nga mga samad sa kalawasan lakip na sa ulo, gelayong nakabsan sa hinulamang kinabuhi ang biktima.
Giditini sa police station ang sakyanan ug drayber apan gipagawas ra kini human nagkasinabot ang pamilya sa biktima og sa kompanya.
Sa karun, gipahiluna na ang patay’ng lawas sa biktima sa pribadong punerarya sa may Purok-1, Barangay Ampayon, ning siyudad sa Butuan.
