Seaman, dakpan sa paglugos sa iyang pag-umangkon sa Agusan del Norte
BUTUAN CITY – Posibleng dili na makabalik sa iyang trabaho ang usa ka seaman kinsa gisikop human matud pa niini gilugos ang iyang 18-anyos nga pag-umangkon og nakuhaan pa og usa ka sachet sa gidudahang shabu atol sa gilusad nga pursuit operation sa Brgy. Doña Telesfora, lungsod sa Tubay, Agusan del Norte.
Naila ang suspek nga si Henson Zapico, 39-anyos, residente sa Brgy Doña Telesfora.
Natigayon matud pa ang maong insidente niadtong Martes sa gabii human gipugos sa suspek ang biktimang gitago lang sa pangalang Inday pagpakig-inom uban kaniya duol sa plaza sa Cabadbaran City.
Dihang nahubog na ang biktima, gidala gilayon kini sa suspek sa usa ka traveller inn sa Brgy. Mabini, sa susamang siyudad.
Nadawat lang sa kapulisan ang reklamo pagkasunod adlaw dihang misumbong na sa iyang mga magtutudlo ang biktima og sila na ang mitug-an niini ngadto sa kapulisan.
Gihimo gilayon ang pursuit operation pagka-alas-5:15 sa hapon sa maong adlaw diin nakuha nila gikan sa bulsa sa karsones sa nadakpang suspek ang usa ka gramong shabu nga gibana-banang nagkantidad og 11,800-pesos.
Gikostudiya na si Zapico sa Cabadbaran City Police Station og gipasakaan na og kasong rape og paglapas sa Comprehensive Dangerous Drug Act of 2002. (Beth Ruiz)
