BUTUAN CITY – Mapasalamaton ang mga Muslim ning rehiyon sa Caraga nga malampuson nilang tapuson ning adlawa ang balaang buwan sa Ramadan pinaagi sa kasa-ulugan sa Eid’l Fitr.
Sigon ni Sultan Gamal Amerol, ang Eid’l Fitr makonsiderang kapistahan hinungdan nga anaa ang pag-andam og mga pagkaon isip hulip sa usa ka buwan nga pagpu-asa.
Kini isip pasalamat na usab kang Al’lah nga ilang natuman ang usa sa lima ka mga pillars sa Islam.
Gituyo matud pa ang selebrasyon tungod kay dili lalim ang paglabang sa usa ka buwan nga puasa dili lang diha sa pagkaon atol sa adlaw kondili apil na ang pagpu-asa sa mga bisyo lakip na sa pakighilawas.
Niining panahon matud pa sa Ramadan, patas ang mga kabus og adunahan tungod kay pareho silang magpu-asa hinungdan nga pareho silang mubati og kagutom.
Niining panahuna matud pa, matilawan sa mga adunahan ang kinabuhi sa mga kabus.
Kini matud pa ang katuyuan ni Allah sa pagpatuman og Ramadan aron matilawan sa mga adunahan ang kapa-it sa kinabuhi sa mga tawong kabus.
Nanghinaut usab ang sultan nga human niining buwan sa Ramadan, magpa-ubos ang tanan, magminahalay og magtinabangay tungod kay mao kini ang gusto sa Ginoo.
Pinaagi matud pa niini, ma-angkon sa tanan ang tinuod nga kalinaw. (Beth Ruiz)
