BUTUAN CITY – Padayon pang gi-imbestigahan sa mga sakop sa Butuan City Police Station 1 ang natigayong pagpamusil sa Brgy. Maog ning siyudad kaganinang buntag.
Naila ang biktimang si Roberto Ibali, 47-anyos, minyo, residente sa Purok 7 sa maong barangay.
Sigon sa anak sa biktimang si Rey Ann, nakuratan na lang sila dihang sayo pa lang sa buntag, gituktok na lang ang ilang pinuy-anan sa usa ka wala ma-ilang lalaking naka-helmet.
Na-shock sila dihang giduol matud pa sa lalaki ang iyang amahan og gisultihan nga sa sunod dili na mangulit dayong pusil sa maka-usang higayon diha sa iyang ulo hinungdan sa iyang hinanaling kamatayon.
Samtang gibutyag usab ni police station 1 commander Sr. Inps. Paul Paden, suot sa suspek ang full head nga helmet ingon man faded nga jacket hinungdan nga dili gyod mahulagway sa mga saksi ang features niini.
Gani, gibutyag usab sa mga nakasaksi nga nag-inusara lang ang suspek nga sakay sa usa ka DT motorcycle nga andar pa dihang gibiyaan niya sa gawas nga bahin sa panimalay sa biktima.
Gipusil kini sa ibabaw lang nga kilid nga mata nga miresulta sa hinanali niining kamatayon dayong sibat padulong sa wala matinong diteksyon. (Beth Ruiz)
