BUTUAN CITY – Mipalag ang ACT Teachers Partylist sa gipaadayag ni Budget Sec. Benjamin Diokno nga igo na ang suholan sa mga magtutudlo ilabina nga dili sila overworked.
Sigon ni Rosalinda Consad sa ACT Teachers Partylist – Butuan, posibleng gihimong basehan sa kalihim ang sweldo nga kapin 30 mil pesos matag bulan sa mga magtutudlo nga duna’y taas nga posisyon kansa 10 porsyento lang gikan sa kinatibuk-ang ihap sa mga magtutudlo.
Gibutyag ni Consad nga kulang pa kini alang sa mga magtutudlong duna’y upat ka mga anak nga nagtungha ilabina nga apektado usab sila sa TRAIN Law.
Alayon niini, padayon nilang gipanawagan nga ipapasar na ang House Bill 7211 nga nagkantar sa usbaw sa suhulan sa mga magtutudlo.
Gidugang ni Consad nga bakak ang gi-asoy ni Diokno nga dili over work ang mga magtutudlo tungod kay kanunay naman gani silang dili maka-enjoy sa bakasyon tungod sa tambungan nilang mga seminars.
Kini gawas pa sa pangbitbiton nilang mga bulohaton sa eskwelahan pauli sa panimalay aron lang dili matambak ang trabahoon sa tunghaan. (Melody Valledor)
