BUTUAN CITY – Naka-uban na sa iyang pamilya ang usa ka mangingisda nga 21-ka adkaw nang nagpalutaw-lutaw sa kaeagatan sa sidlakang bahin sa Anguar Palau Island, human na-rescue sa mga crews sa M/T Seri Begawan, usa ka Malaysian-flagged tanker vessel.
Na-ila ang survivor nga si Robert Dela Cruz, 39 anyos residente sa Pantalan Uno, Barangay Washington, Surigao City sa lalawigan sa Surigao del Norte.
Nasayrang niadtong Abril 26 pa sila nagpalawod sa Pacific Ocean apan mibuwag siya sa 18 niya ka mga ka-ubanan aron mangisda gamit ang gamay’ng pumpboat og dihang gibalikan niya ang maong lugar, nabiyaan na siya hangtud nga nahutdan siya og gasolina.
Bugtong preskong isda lang ang iyang gikaon og tubig-ulan ang gi-inom aron lang mabuhi hangtud nga na-rescue siya sa mi-aging Malaysian vessel.
Pinaagi sa mensaheng gipadala sa Malaysian vessel ngadto sa Philippine Coast Guard Southeastern Mindanao Operation Center, mibiyahe ang mga personahe sa BRP Tubbataha (MRRV 4401) padulong sa Palau Island diin ilang gisundo si Cruz uban sa iyang pamilya.
Gihatagan ni Captain Marco Antonio Gines, Commanding Officer ng MRRV 4401 og Certificate of Appreciation og Letter of Commendation si Captain Manjit Lal og ang mga crews sa M/T Seri Begawan tungod sa ilang gipakitang kaayo ngadto sa maong mangingisda. (Melody Valledor)
