BUTUAN CITY – Gi-angkon sa tigpamaba sa rebelding New People’s Army nga sila ang mipusil-patay sa First Kagawad sa Barangay Mahaba, Cabadbaran City kaganinang kaadlawom.
Giila ni P/ Sr. Insp. Renel Serrano, Hepe sa Cabadbaran City Police Station, ang biktima nga si Edgar Panisan alyas Gaga , 41-anyos og kanhe miyembro sa CAFGU adiser kini napiling first kagawad sa bag-ohay pa lang nahuman nga piniliay.
Sigon sa opisyal nga ala1:30 sa buntag sa dihang nakadawat silag taho gikan sa guwardiya sa Cabadbaran City District Hospital may kalabutan sa gidalang biktima sa pagpamusil.
Sa inisyal nga imbestigasyon, dunay sayawan sa maong barangay diin mitambong ang biktima.
Kalit nalang matud pa misulod ang mga suspetsado ug gelayong pusil sa kagawad nga mi-igo sa dughan hinungdan sa hinanaling kamatayon niini.
Nahinabi pa ang anak sa biktima nga nag-ingong nakakita siya mismo sa mipusil sa iyang amahan apan wala siya makaela niini. Nakuha usab sa crime scene ang basyu ug buhing bala sa kalibre 45 nga pistola.
Nakatutuk matud pa ang ilang imbestigasyon nga binuhatan kini sa NPA tungod kay nakadawat naman ug hulga sa kinabuhi ang biktima gikan sa rebeldeng grupo adiser pa ang panghitabo.
Dunay close coordination na nga ilang gihimu ngadto sa 29th Infantry Battalion, Philippine Army aron makahimu ug lawom nga imbestigasyon.
Samtang gidala usab ang anak sa biktima ngadto sa Crime laboratory aron makuhaan ug computerized facial sketch aron mailhan ang mga suspetsado.
