BUTUAN CITY – Gihangyu sa usa ka survivor sa aksidenteng pagkahulog sa Philtranco bus sa usa ka tulay sa Brgy. Buntay, Tanauan, Leyte, nga mabalik ang iyang nawalang handbag diin atua ang iyang mga importanteng gamit, lakip na ang cash.
Sa eksklusibong pakighinabi sa Bombo Radyo Butuan, mihangyu ang survivor nga si Melda Mangilin, single mom nga taga Barangay Simone, lungsod sa Kabacan, North Cotabato nga mabalik lang ang iyang handbag nga nawala sa maong aksidente.
Saysay pa ni Mangilin nga niadtong na-rescue na sila human sa aksidente, wala na niya malakip sa iyang gi-declare sa pulis ang nawala niya nga handbag tungod sa sakit nga gipamati sa dughan diin ulahi nang nabantayan nga dunay duha niya ka ribs nga nabali.
Ang nasangpit nga handbag dunay sulod nga passport, mga atm card, salaping cash ug mga IDs nga gamiton unta niya sa pagpaabot sa petsa pag-adtu sa nasud nga Oman diin siya nagtrabaho isip mananahe.
Gisaysay usab niini ang kadismaya sa ospital diin siya gidala human sa aksidente tungod kay igo lang siya gipailalom sa x-ray ug gitupukan sa pagpawala sa sakit dayung pagawas sa ospital tungod kay wala matud pay nakitang deperensiya sa iyahan.
Samtang wala man lang siya gihatud sa police station diin siya kuhaan ug pamahayag.
Paglabay pa sa duha ka adlaw adiser niya nasayran nga dunay duha ka ribs nga nabali sa iyang lawas ug na-admit pa hangtud sa pagkakarun sa usa ka ospital sa Davao City.
Hinoon mitabang matud pa sa balayrunon sa ospital ang Philtranco bus.
