BUTUAN CITY – Emosyunal karon ang mga kabanay og mga suod nga higala sa usa sa lima ka mga tawong namatay sa duguong vehicular accident kagahapon sa hapon sa Brgy. San Pedro, lungsod sa Alegria, Surigao del Norte.
Kini human natinuod ang gi-share niining post sa iyang Facebook account tulo ka adlaw adiser ang ngilngig nga aksidente.
Nahuna-hunaan gilayon sa mga kabanay og higala sa 20-anyos nga lesbian nga si Donnafel Lagurin, residente sa Bayugan City sa lalawigan sa Agusan del Sur, nga silibon ang post sa iyang mga social media accounts og dako na lang ang ilang kakurat dihang nakita ang post niini sa iyang FB account nga Kidnxtdoor niadtong Martes lang, Mayo 22.
Nakalatid sa gi-share niining post ang kawala na’y ganang mabuhi apan tungod kay dili niya gustong masakitan ang iyang pamilya og mga higala, hinungdan nga dili na lang siya magpakamatay og antuson na lamang niini nga magpakabuhi uban sa panghinaut nga unta mabanggaan siya og sakyanan.
Ka-uban ni Lagurin nga namatay sila Joe Basil Viray, John Bryle Viray, Max Bayotas og Joseph Arbis samtang anaa sa kritikal nga kondisyon usab sila Yul Arbis, Yul Adrian Arbis og Rusty Bayotas.
Una nang gipadayag ni P/Chief Insp. Juan Belarmino sa Alegria Municipal Police Station, nga kusog ang pagpadagan sa duha ka mga sakyanan nga nagsunod sa usa ka bus dihang kalit na lang mi-overtake ang Isuzu D-Max hinungdan nga na-sideswipe niini ang gisundang Mitsubishi Fuzion hinungdan sa pagka-igo sa Fuzion sa punuan sa mangga samtang nahulog usab sa pangpang ang Isuzu D-Max. (Beth Ruiz)
