BUTUAN CITY – Padayon pa ang imbestigasyon sa kapulisan sa natigayong vehicular accident sa Brgy. San Pedro, Alegria, Surigao del Norte pasado alas- 3:40 kagahapon sa hapon nga mikalas og lima ka kinabuhi aron masuta ang angayang manubag sa maong insidente og ang tukmang address sa mga biktima.
Naila ang mga biktimang nakalas nga sila Joe Basil Viray, John Bryle Viray, Max Bayotas, Donnafel Lagurin ug Joseph Arbis samtang pabiling anaa sa kritikal nga kondisyon sila Yul Arbis, Yul Adrian Arbis ug Rusty Bayotas.
Sumala ni PC/Insp. Juan Belarmino sa Alegria Municipal Police Station, base na sa pamahayag sa mga nakasaksi, kusog matod pa ang dagan sa duha ka sakyanan nga nagsunod sa usa ka bus dihang mi-overtake sa gisundan nga bus ang Isuzu D-Max hinungdan nga na- sideswipe niini ang gisundang Mitsubishi Fuzion.
Maayong pagkaguba sa simod nga bahin sa Mitsubishi Fuzion nga duna’y sakay nga 7 ka mga tawo human kini nabangga sa punoan sa mangga samtang ang nagsunod nga Isuzu D-Max nga padulong dinhi sa Butuan nahagbong ug nalimbuwad sa pangpang nga bahin sa kilid nga dalan. (Melody Valledor)
