BUTUAN CITY – Gitoohang depression human nabiktima sa scam ang hinungdan sa matud pa pagpakamatay sa usa ka security guard sa Surigao City pinaagi sa pagpusil sa kaugalingon.
Sigon ni Police Supt. Deomedes Cuadra jr. Hepe sa Surigao City Police Station, naka duty ang biktimang si John Cerelo hapson, 52-anyos, taga Purok Katipunan, Barangay Poblacion, San Francisco, Surigao Del Norte, usa ka guwardiya sa bangko sa maong dakbayan sa dihang nahitabo ang insidente kaganinang alas 8:30 sa buntag.
Sumala sa inisyal nga imbestigasyon nabiktima matud pa ang maong security guard sa scam diin dunay usa ka batan-ong lalaki nga mihangyu kaniya nga makigamit sa iyang bank account maoy rason nga nahanaw ang iyang 12-mil pesos nga cash. Human niadto, na-depressed matud pa ang biktima nga maoy gitudlong hinungdan sa pagpusil sa kaugalingon gamit ang shot gun.
Nakadungog nalang matud pa ang mga kliyente ug buto sa armas sa may parking area ug sa ilang pagsusi, nagkadugo na ang biktima nga dunay nga dunay samad pinusilan ang ulo.
Bisan paman niini, padayon gihapon ang ilang imbestigasyon sa posibleng foul play sa hitabo samtang gipaningkamutan nga mahinabi ang pamilya sa biktima./
