BUTUAN CITY – Gi-asuy sa survivor nga si Lemuel Copera nga taga Lanuza, Surigao Del Sur ang kasinatian sa pagkahulog sa gisakyang bus kagahapon sa kaadlawon sa may tulay sa Barangay Buntay, Tanauan, Leyte.
Sumala pa niini kauban niya sa maong biyahe ang iyang asawang si Edelita ug silingan nga Estanislao Nimperas nga pauli na unta gikan sa Pasay City.
Nakatulog matud pa siya niadtong higayona sa dihang nabantayan nga nagkagulkol ang bus og nasuta nga nahulog na kini sa tulay.
Maayo nalang matud pa kay nasangit kini sa poste ug wala ra gyud miabot sa pinaka-ubos nga bahin.
Nakita niya ang mga kaubanang pasahero nga dunay mga samad sa kalawasan diin dunay namatay.
Samtang na-ipit ang iyang tuhod ug nabundakan sa bagahe ang iyang asawa og ang iyang silingan, daghang mga samad apan sa karun maayu na ang ilang kahimtang.
Madunggan pa niini ang pagpangayu ug tabang samtang nagkaguliyang na ang tanan.
Gi-atiman usab sila sa lokal nga kagamhanan sa Tanauan og gibutang karun usa ka eskwelahan samtang padayun ang assessment kung pwede naba silang makapauli. (Rolan Janea)
