BUTUAN CITY – Gi-dismiss sa Court of Appeals ang kasong administratibo nga gisang-at batok kang Bislig City, Surigao del Sur Mayor Librado Navarro human gikonsidera sa maong korte ang gisumite niyang petisyon.
Kini may kalabutan na sa gikwestyon nga transaksyon sa gipalit na backhoe excavator sa ilang lokal nga kagamhanan niadtong tuig 2012.
Sa eksklusibong pakighinabi ning sibyahan, gipadayag sa mayor nga iyang gikalipay ang desisyon sa korte kondiin usa sa gihimong basehan pag-abswelto kaniya sa maong kaso mao ang regular niya nga transaksyon sa pag-procure sa maong ekwipo.
Giklaro sa mayor nga wala siya napahawa sa pwesto tungod kay wala napatuman ang dismissal o kaha suspension batok kaniya, human nga nakakuha siya ug temporary restraining order ug writ of preliminary injunction.
Gibutyag usab ni Mayor Navarro nga gawas sa kasong administratibo, duna pa siya’y gi-atubang nga kasong kriminal sa Sandiganbayan apan dako ang iyang pagsalig nga ma- dismiss usab kini. (Beth Ruiz)
