BUTUAN CITY – Gikumpirma sa rebeldeng grupong New People’s Army (NPA) nga miyembro sa Western Agusan del Sur/Agusan del Norte Sub-Regional Command ang patay’ng lawas nga narekober sa militar sa Brgy. Sinacungan, lungsod sa Esperanza, Agusan del Sur ning mi-aging mga adlaw.
Gawas sa pagkumpirma sa nagpa-ilang tigpamaba sa NPA nga si Ka Omar Ibarra nga ka-ubanan nila ang nakabot nga si ka Marjun, nasayran usab nga duha diay sa ilang mga ka-ubanan ang nalubong sa gilay-ong 500-metros gikan sa Patrol Base sa 23rd Brigade Philippine Army nga nakabase sa maong lugar.
Ang usa na-ilang si Ka Bagani nga parehong namatay human nila gi-harass ang maong patrol base niadtong Mayo 14 sa alas-3:40 sa kaadlawon nga milungtad hangtud sa alas 6 sa buntag hinungdan nga na-delay og 30-minutos ang botohay sa maong lugar.
Una nang gikondena sa Armed forces of the Philippines ang pag-atake sa walhong grupo human kini nagpadayag og hunong-opensiba atol sa Barangay og Sangguniang Kabataan Elections. (Melody Valledor)
