BUTUAN CITY – Nakasinati na ug pagkapalong sa linya sa kuryente ang municipalidad sa Loreto ug Libjo, sa probinsiya sa Dinagat Islands human ang pagtay-og sa 5.7 magnitude nga linog kagabii.
Apan hinoon walay gikatahong damyos sa maong pagtay-og base na usab sa update gikan ni Dinagat Islands Provincial Disaster Risk Reduction and Management Office kon PDRRMO Officer Rosario Inday Roxas-Alon.
Gikabutyag usab ni ENGR. Antonio Madrio sa Phivolcs-Surigao nga wala pa silay nadawat nga impormasyong dunay nadamyos sa linog samtang pabiling normal ang balud sa kadagatan sa maong dapit. Apan posible matud pa ang damyos tungod sa kakusog sa linog hinungdang padayon silang mikutay sa mga hingtungdang ahensiya sa ilang dapit.
Mahinumdumang mitay-og ang 5.7 magnitude nga linog alas 7:57 kagabii sa lungsod sa Libjo, Dinagat island diin dunay gilawmong 21 kilometros ug tectonic ang origin.
Nasinatian ang Intensity 5 sa Surigao City ug Guian og Salcedo, sa Eastern Samar.
Dunay Intensity 4 sa Carascal, Surigao Del Sur; Lawaan at Giporlos, Eastern Samar; Butuan City; San Francisco, San Juan ug Hinunangan, Southern Leyte; ug Tolosa, Leyte.
Narehistro usab ang Intensity 3 sa Dulag Leyte; Gingoog, Misamis Oriental; ug Palo, Leyte samtang dunay Intensity 2 sa Hinatuan, Surigao Del Sur; ug Cagayan De Oro City.
Gikataho usab nga nakabaton ug instrumential intensities diin dunay Intensity 2 sa Camiguin Island ug Intensity 1 sa mga siyudad sa Cebu, Sorsogon ug Bislig.
Samtang nagpahimangno usab ang Philippine Institute of Volcanology and Seismology (Phivolcs) sa gilaumang mga aftershock.
