BUTUAN CITY – Padayon pa ang imbestigasyon sa kapulisan sa Butuan City Police Station kon BCPS-4 sa pagpusil sa surgeon sa Butuan Medical Center kaganinang alas-8:45 sa buntag hinungdan sa iyang pagkalandig sa balay-tambalanan.
Ang biktimang si Dr. Frederick Padilla na-igo sa walang kamot nga molapos sa tuong bahin sa iyang tiyan.
Sigon sa gwardiyang si Peterson Bunggulong, gipusil matud pa si Dr. Padilla sa parking lot sa gawas nga bahin lang sa emergency room kinsa daling nakapangayo kaniya og tabang hinungdan nga iya kining gidagan.
Migawas sa ilang inisyal nga pakisusi nga sakay matud pa sa usa ka 4-wheeled vehicle ang naka-mask nga suspek nga gisundan sa nakamotorsiklo usab nga laing suspek kinsa daling mikaratil og dagan human sa hitabo.
Mahinumdumang nadakpan na kaniadto ang maong doktor sa gilusad nga buy bust operation sa Butuan City Police Office batuk sa target sa maong operasyon nga si Jefrix Galon alias “Jepoy.”
Nakuha gikan kang Jepoy ang walo ka mga sachets sa suspected shabu, buy-bust money, og cash nga kapin sa 5-mil pesos apil na ang mga drug paraphernalia.
Nagnegatibo usab sa drug test ang doktor hinungdan nga gibuhian gilayon siya. (Beth Ruiz)
