BUTUAN CITY – Giklaro ni Captain Anthony Pueblas – Civil Military Operations kon CMO officer sa 402nd Brigade, Philippine Army nga kaya nilang pamatud-an nga dili mga sibilyan kondili mga rebeldeng New People’s Army ang duha ka lalaking ilang nadakpan human ang 30-minutos nga engkwentro niadtong Sabado sa alas-singko sa buntag didto sa Brgy. Can-aga, lungsod sa Malimono, Surigao del Norte.
Gi-ila sa opisyal ang mga nadakpan nga sila Larry Vergara, 38-anyos, residente sa lungsod sa Mainit, Surigao del Norte ug Felipe Daragoza, 47 anyos, residente sa Agusan del Sur, mga membro sa Guerilla Front Committee 16-B sa NPA.
Gibutyag sa opisyal nga imposibleng makonsidera silang mga sibilyan tungod kay nadakpan sila sulod mismo sa na-ulog nilang kampo sa mga rebelde.
Gawas pa, nakuha usab gikan sa ilang posisyon ang duha ka improvised explosive devices kon IEDs kon landmine, usa ka iCom radio, usa ka paresan sa combat boots, usa ka shotgun, mga subersibong dokumento og salaping cash balor 53-mil pesos nga gitu-uhang extortion money nga ilang nakuha gikan sa mga mukandidato sa barangay og SK elections karong Mayo.
Gi-angkon pa sa opisyal nga adiser pa nila gilusad ang combat operations, nakadawat na sila og taho gikan sa mga sibilyan og mga mikandidato alang sa barangay og SK elections samtang gihimo ang covenant signing sa lungsod sa Malimono sa maong lalawigan hinungdan nga ila gilayon kining girespondihan.
Dili na matud pa madawat sa mga residente ang padayong pagpangayo og pagpangilkil og kwarta sa mga rebelde alang sa ilang gitawag nga permit to win og permit to campaign sa mga kandidatong mu-abot sa ilang lugar nga nasakupan.
Temporaryong gikostudiya ang mga dinakpan ngadto sa kapulisan aog gihatagan sa mga angayan gihapon nilang madawat isip mga prisoners of war isip pagtamod na usab sa tawhanong katungod.
