BUTUAN CITY – Pasakaan og kasong parricide ang mister nga miluba-patay sa iyang misis ning milabay’ng adlaw sa Surigao City.

Sigon ni Police Superintendent Diomedes Cuadra, ila nang gi-andam ang mga dokumento og ebidensyang gamiton sa pagpasaka nila og kaso batuk sa at large pa gihapong suspek nga si Eugenio Loca Arot, 43 anyos, usa ka mag-uuma.

Mahinumdumang gieklarang dead on arrival sa attending physician ang biktimang si Monalisa Espancho Arot, 43 anyos, residente sa Brgy. Urok sa maong siyudad human sa maong hitabo.

Base sa asuy ni P/Supt. Cuadra, misulod isip tighugas og plato ang biktima sa panimalay ni Awing Declaro niadtong adlaw nga natigayon ang maong insidente kondiin gisa-ulog usab ang piyesta sa maong lugar.

Mi-adto matud pa ang suspek sa biktima diin sila nagkalalis nga misangpot sa pagpangluba dayong sibat padulong sa wala matinong direksyon. (Melody Valledor)