BUTUAN CITY – Gipanghinaot sa Kapisanan ng mga Brodkaster sa Pilipinas kon KBP –Butuan City/Agusan del Norte Chapter nga mahunong na unta ang pagpangatake ngadto sa mga anaa sa media.
Sa pakighinabi ning sibyahan, gibutyag ni Engr. Romeo Zerrudo, presidente sa maong kahugpongan, kini ang iyang panghinaot subay sa pagselebrar sa World Press Freedom Day kagahapong adlawa dungan sa paghatag usab niini ug pahimangno ngadto sa mga kaubanang media nga unta himuong sakto ang ilang pagbalita ug dili magpagamit sa pipila ka mga political figure.
Sigon niini, unta dili usab nila dugangan o ba kaha kuhaan ang paghatag ug impormasyon tungod kay usa kini sa mga rason kung ngano adunay uban nga mabiktima sa pagpangatakea og magmatinud-anon lamang sa ilang profession.
Samtang gibutyag usab ni Alfredo ‘Nonoc’ Plaza, sa KBP – Agusan del Sur Chapter, nga ang maong kasaulogan usa ka tukma nga pagpahinumdom ngadto sa katawhan hilabi na ngadto sa gobyerno sa kamahinungdanon ug katungod sa freedom of the press sa matag usa.
Sigon niini, subo pamalandungon ang mga pag-atake ngadto sa mga personahe sa media kansa gituohang adunay kalambigitan sa ilang trabaho.
Matud pa nga ubay-ubay na ang mga natalang susamang panghitabo ilawom sa kasamtangang administrasyon ug padayong nalakip ang nasud sa mga lugar kungdiin delikado ang kinabuhi sa mga tigbalita. (Mon Aplaya)
