BUTUAN CITY – Padayon ang imbestigasyon sa kapulisan sa lungsod sa Trento, Agusan del Sur aron madakpan ang responsable sa pagpusil-patay sa usa barangay health worker kon BHW sa ingon masayran ang motibo sa kremin.
Gi-ila ni P/Chief Insp. Gerry Fernandez, hepe sa Trento Municipal Police Station ang biktimang si Perla Escuadra, residente sa Purok 5, Brgy. New Visayas, sakop sa maong lungsod.
Sigon sa opisyal, misulod sa pinuy-anan sa biktima pasado alas-8:20 kagabii ang wala ma-ilang suspek dayong pusil niini sa makalima ka higayon diha sa iyang lawas resulta sa iyang hinanaling kamatayon.
Apil sa mga anggulong ilang gitutukan ang pagkasuko matud pa mga rebeldeng New People’s Army kon NPA sa pagbalhin og simpatiya sa biktima gikan sa ilang grupo ngadto na sa tropa sa gobyerno human kini misulod pagka-BHW.
Nakig-alayon na sila sa mga sakop sa 25th Infantry Battalion, Philippine Army aron madakpan gilayon ang responsable. (Beth Ruiz)
