BUTUAN CITY – Gikatingala pag-ayo sa barangay kapitan sa Brgy. San Antonio, RTR, Agusan del Norte ang pagkalakip sa iyang pangalan sa gipagawas nga narcolist sa mga barangay officials sa buhatan sa Philippine Drug Enforcement Agency ( PDEA ).
Sa pakighinabi ning sibyahan, gibutyag ni Brgy. Kapitan Benito Salvani Jr. sa maong barangay, nga gikatingala niya ang pagkalakip sa iyang pangalan sa nasangpit nga Narcolist tungod kay wala man siya nakahimo ug mga binuhatan nga adunay kalambigitan sa ilegal nga druga sa iyang barangay.
Sigon niini, nga nahimong aktibo matud pa siya sa ilang Barangay Anti-Drug Abuse Council (BADAC) gani naka- 2nd placer pa siya sa maong programa sa probinsyal level nga assessment.
Matud pa nga nakurat gyud siya sa maong isyu tungod kay saksi matud pa ang kadaghanan nga wala siya’y anomalya ug ilegal nga mga binuhatan diha sa iyang barangay.
Hinuon gikumpirma niini nga gianhaan na matud pa siya sa mga kapulisan sa RTR aron nga I-validate ang iyang record.
Gibutyag usab niini nga wala siya’y record sa buhatan sa kapulisan sa ilang lungsod mahitungod sa ilegal nga drugas.
Wala usab siya nalakip sa watchlist sa ilang lungsod. Giklaro niini nga igo lang siya nagbuhat ug maayong serbisyo ngadto sa iyang mga konstituwente.
Gani daghan na usab siya ug gipadakop nga nalambigit sa ilegal nga druga apan ngano matud pa nga nalakip man siya sa narcolist nga gipagawas karon sa PDEA.
Panawagan na lamang niini ngadto sa iyang mga konstituwente nga dili lang mabalaka tungod kay nasayod man sila sa iyang mga gipanghimo.
