BUTUAN CITY – Gahinan og 11.9-milyunes pesos sa Tourism Infrastructure and Enterprise Zone Authority kon TIEZA ang tukuron nga duha ka mga viewing decks sa may Agusan Marsh partikular sa lungsod sa Loreto, Agusan del Sur.
Sigon ni Tourism Caraga regional director Ma. Ana Nuguid, ang proyektong tawgong “Panglabuhan Floating Village Adventours/Bird Watching,” naghulat na lang og report sa mga documentary requirements og final evaluation gikan sa ground ingon man sa report sa local government unit sa Loreto adiser mapagawas ang budget aron masugdan na ang konstruksyon niini.
Higayong matapos na, makabaton na unya og mas klaro nga view ang katawhan ilabina ang mga langyaw og foreign tourists, sa mga langgam og sa mga migratory birds ilabina kay perpekto kini alang sa pagpahulagway diin background ang mga wild birds.
Nasayran nga matag-winter season sa Japan, China, og Russia, mukabat sa 200-mil ka mga migratory birds gikan sa 200 ka nagkada-iyang bird species ang mu-migrate ngadto sa Agusan Marsh, aron makalikay sa kabugnaw sa mga nasud nga ilang gigikanan.
Plano sa gobyerno nga i-highlight ang pagtumaw niini nga mga migratory birds pinaagi sa bird watching og photography.
Nasayrang ang Agusan Marsh host usab ngadto sa “Wonderland”, tungod kay dinhi makita ang natural “bonsai” nga mga kahoy nga uban sa pagtubo sa kina-iyahan.
Dinhi usab nagpuyo ang gila-ilang pinakadakong buaya sa tibuok kalibutan nga si Lolong.
Nasakop ang Agusan Marsh sa mga lungsod sa San Francisco, Rosario, Bunawan, Veruela, Loreto, Talacogon og La Paz, sa susamang lalawigan sa Agusan del Sur. (Beth Ruiz)
