Bugtong at-large suspect sa Bukidnon robbery, gidala na gikan Agusan del Norte

BUTUAN CITY – Gidala na kagahapon sa kapulisan sa Malaybalay City sa Bukidnon ang bugtong at-large nga suspek sa pagtulis sa field manager sa ACDI Multi-Purpose Cooperative field office sa maong siyudad human nadakpan ning mi-aging hapon sa mga sakop sa Regional Intelligence Division sa Police Regional Office-13 og sa Balaybalay City PNP.
Sigon ni P/Supt. Martin Gamba, hepe sa R2 Division sa Police Regional Office 13, ang nadakpang si Michael Sususco, 21-anyos, minyo og residente sa Purok 8, Brgy. Poblacion, Santiago, Agusan del Norte, mao matud pa ang mipusil sa field manager nga si Medardo Sajonia, 62-anyos, kinsa maoy nagbitbit sa 5-milyunes pesos nga kwartang gikan pa gi-withdraw sa bangko.
Nagkatibulaag matud pa sila human sa hitabo kondiin si Sususco, gihatud og motorsiklo gikan sa Impasug-ong pa-ubos lahos na sa Brgy. Puerto sa Cagayan de Oro City.
Didto matud pa siya misakay og panel og tungod sa paggukod sa mga pulis kaniya, mi-ambak matud pa siya sa pangpang kondiin nabilin matud pa ang kwarta nga iyang gidala.
Dinhi na dayon siya misakay padulong sa ilang pinuy-anan. (Beth Ruiz)