BUTUAN CITY – Gibana-banang muabot sa 500-mil pesos ang damyos human nasunog ang panimalay ni Butuan City Councilor Gil Unay sa may Villa Kananga ning siyudad sa Butuan.
Sa pakighinabi ning sibyahan Kang Fire chief inspector Peter Montaos, City Fire Marshall sa Bureau of Fire Protection kon BFP-Butuan, gikumpirma niini nga alas 3:25 kaganinang hapon nila nadawat ang firecall hinungdang dali nila kining girespondihan.
Apan tungod sa kapit-os sa dalan, nahulog pa sa kanal ang usa nila ka firetruck. Sa pag-abot sa nahitaboan, nasutang walay tawo ang nasunog nga panimalay nga gitoohang nga sa inisyal nga pagpakisusi, electrical wiring ang hinungdan sa pag-ulbo sa kalayu nga sa karun padayon pang gikumpirma.
Sumala pa niini nga totally burned ang sulod sa balay apan wala na hinoon kini nakadamay pa sa mga silingan.
Samtang sa pakighinabi kang Atty. Gil Unay, nagpasalamat nalang kini kay wala may nadamay nga kinabuhi sa maong sunog.
Pagbutyag pa sa konsehal nga makita ra pag-usab ang nalamoy sa kalayu nga mga butang sulod sa balay, lakip na niiini ang iyang mga dokumento, apan ang labing mahinungdanon ang kinabuhi sa tawo.
Saysay pa niini nga walay tawo ang ilang balay niadtong mga panahona, diin siya mitambong sa regular session sa Sanguniang Panlungsod.
