Nahabiling at-large nga suspek sa robbery-holdup sa coop manager sa Bukidnon, dakpan sa Agusan del Norte

BUTUAN CITY – Ipresenta unyang hapon sa Police Regional Office-13 ang nahabilin og bugtong at-large nga suspek sa robbery hold-up niadtong Abril 23 sa manager sa ACDI Multi-Purpose Cooperative nga nakabase sa Malaybalay City sa lalawigan sa Bukidnon.
Kini human nadakpan sa mga sakop sa Regional Intelligence Division sa Police Regional Office kon PRO 13 og sa Malaybalay City Police Station pasado alas-4:30 kagahapon sa hapon ang suspek nga si Michael Sususco, 21-anyos, minyo, didto mismo sa iyang pinuy-anan sa Purok 8, Brgy. Poblacion lungsod sa Santiago, Agusan del Norte.
Nasayrang sakay lang motorsiklo ang biktimang si Medardo Sajonia, 62-anyos, bitbit ang 5-milyunes pesos nga cash kansa gisulod lang sa backpack.
Sa eksklusibong interview sa Bombo Radyo Butuan, nakahilak pang gi-angkon sa suspek nga gihanyagan siya sa iyang ig-agaw nga si Daniel Buyan og trabaho hinungdan nga nakurat na lang siya nga pagpang-hold up na ang iyang gisudlan kondiin ilang nabiktima ang cooperative manager.
Dugang pa ni Sususco, ang nasangpit nga insidente mao na ang ikaduhang gipahimo kaniya human nga iyang gibalibaran ang unang misyon kondiin gipapatay kaniya ang usa ka babaryeng manager sa Gingoog City tungod sa gibati niyang kaluoy.
Gibaharan matud pa siyang patyon na hinungdan nga napugos siyang mu-uban sa maong operasyon.
Kahinumdumang napasakaan na og kasong robbery with homicide og illegal possession of explosives sila Rolly Gornes Bazares nga taga-Magallanes, Sorsogon; Daniel Arado Buyan sa Cabadbaran City, Agusan del Norte og Oliver Saluday Saunay sa Monkayo, Compostela Valley Province. (Beth Ruiz)