BUTUAN CITY -Nasakop ni Pinoy Aquaman Ingemar Macarine ang isla sa Siquijor pinaagi sa wala’y hunong og wala’y ka-abag nga paglangoy sa 24.65-kilometros nga dagat sa maong isla.
Malampusong nalangoy nga swimming lawyer sulod sa 11-oras og 21-minutos ang kadagatan sa Siquijor gikan sa Silliman Beach sa Dumaguete City, lalawigan sa Negros Oriental padulong ngadto sa Tambisan Port, sa lungsod sa San Juan, lalawigan sa Siquijor.
Tumong niini ang pag-promote sa voters’ registration og mas limpyong kadagatan.
Gibutyag sa Pinoy Aquaman nga kini ang pinakalisod niyang paglangoy sukad masukad taliwa nga pila ka higayon na niya kining giplanuhan og gisalindot.
Sigon ni Macarine, kalma pa ang dagat sa unang pipila ka kilometro sa iyang paglangoy hangtud nga nahimo kining baluron apan iya gihapong nalabangan hangtud nga naka-abot siya sa Siquijor.
Tungod sa maong paglangoy, nabuak ni Atty. Macarine ang iyang personal record nga 23-kilometros dihang misulay siya paglangoy gikan sa Visayas ngadto sa Mindanao niadtong Mayo 2014. (Beth Ruiz)
