BUTUAN CITY – Bisan og mao pa lama’y pagsugod sa election period alang sa barangay og Sangguniang Kabataan (SK) elections, pipila sa mga senior citizens na sa lungsod sa Buenavista, Agusan del Norte ang nagplanong mu-boycott na sa maong eleksyon.
Kini human matud pa sila gihadlok sa usa sa mga tawo sa mayor nga tangtanggon sa listahan sa mga makadawat og social pension gikan sa DSWD kung dili mubotar og straight sa ilang mga kandidato.
Sigon ni Kapitan Virgilio Lascuña sa barangay Malpoc, miduol kaniya ang pipila sa ilang mga constituents nga mga senior citizens tungod kay wala nila nagustuhan ang gihimo sa usa ka ginganlan og Rodrigo Asistido nga nagpa-ila-ila na matud pa sa iyang mga ka-lineup alang sa maong eleksyon.
Gidugang sa kapitan, dismayado na matud pa ang maong sektor sa gihimong pagpanghadlok ngadto kanila hinungdan nga gusto na lang nilang mu-boycott taliwa sa ilang kapursigidong i-exercise ang ilang katungod nga makabotar. (Beth Ruiz)
