BUTUAN CITY – Miabot sa kinatibuk-ang 156 ka kanhe rebelding New People’s Army kon NPA nga kadaghanan mga lumads ang nakapahimulos sa livelihood skills training nga gipahigayon sa Advance Command Post sa 36th Infantry (Valor) Battalion sa Barangay San Juan, Madrid, Surigao del Sur.
Sigon ni Capt. Francisco P. Garello Jr., Civil Military Operation kon CMO chief sa 36th IB, ang nasangpit nga mga kanhe rebelde ang misurender sa nagkalain-laing units sa 36th“Valor” Battalion kangsa nakakuha sa trainings sa motorcycle mechanic, food processing, driving ug personal computer operation.
Atol sa opening program, gipahayag ni 36th IB commander Lt. Col. Xerxes A. Trinidad ug Carmen Mayor Jane V. Plaza ngadto sa mga kanhe rebelde nga ang gobyerno magpadayon sa pagtabang kanila hangtud nga mahaw-as sila sa ilang kasamtangang kondisyun sa panginabuhian.
Ang gipahigayong trainings mao ang resulta sa panag-estorya nga gihimu sa indigenous peoples ug mga kanhe rebelde. Nag-unang tumong niini nga mahatagan sila ug alternatibong panginabuhian, nga sustainable aron sa ingon mapa-angat ang ilang kinabuhi og dili na madala pa sa mga haylo sa walhong grupo.
Gipaneguro sa 36th IB commander sa mga nahabiling mga rebelde nga mokanaog gikan sa kabukiran, nga maka-avail usab sa maong libreng livelihood skills training.
Ang unang livelihood skills training ngadto sa mga kanhe rebelde sa lungsod sa Carmen ang inisyatiba sa 36th “Valor” Battalion, sa pakig-alayon sa lokal nga kagamhanan ug TESDA.
