BUTUAN CITY – Gelayong naila ang patay’ng lawas nga nakit-ang naglutaw-lutaw sa Agusan River ning siyudad sa Butuan kaganinang alas 11:30 sa sayung kaudtuhon.
Sigon ni Police Senior Inspector Paul Paden, station commander sa Butuan City Police Station-1, human nakaplagan ang patay’ng lawas, dunay nagpailang usa ka Nonita Yu, biyuda nga taga Purok-7, Barangay Tandang Sora, Butuan City diin mi-angkong iyang anak nga si Mark Dindi Yu, 20-anyos, olitawo ang nakit-ang patay’ng lawas.
Sigon ni Police Senior Inspector Paden, niadto pang Abril 8 sa sayung buntag, nawala ang biktima.
Gi-asuy matud pa sa inahan nga sa niaging tuig pa nila na-obserbahang dunay diperensiya sa panghuna-huna sa anak nga kanunay matud pang maghisgut nga magpakamatay, sama nalang sa pagluba sa iyang kaugalingon ug pag-ambak sa Agusan River.
Ila kining gipalantaw sa doctor ug na diagnose sa sakit nga mental disorder.
Bisan paman niini, gihagit sa pulis ang kabanay sa biktima nga ipa-ilalom sa otopsiya ang patay’ng lawas aron sa ingon matin-awan ang tanan sa hinungdan sa kamatayon niini.
Sa karun, nagsumite na sila ug request for autopsy sa patay’ng lawas nga gipahiluna na sa pribadong punerarya ning siyudad sa Butuan.
